नवलपुरमा बस पल्टियो, ४ जना घाइते
नवलपुर । नवलपुरको वियनी त्रिवेणी १ दुम्किबास होङसी गेट नजिकै गएराति बस दुर्घटना भएको छ ।
जिल्ला प्रहरी कार्यालय नवलपुरका अनुसार काठमाण्डौबाट अर्घखाँचीको लागि छुटेको लु २ख २१४१ नम्बरको यात्रुबाहक बस दुर्घटना हुँदा बसमा सवार ३४ जना मध्ये ४ जना घाइते भएका छन् ।
चालकले नियन्त्रण गुमाई सडकको दायाँ साइडमा पल्टिन जाँदा सवारी दुर्घटना भएको प्रहरीले जनाएको छ ।
दुर्घटनामा परी अर्घाखाँची जिल्लाको मालारानी गाउँपालिका ४ बस्ने ६३ बर्षीय शोभाखर खनाल, गुल्मी जिल्लाको मदने गाउँपालिका ८ बस्ने ६४ बर्षीया सरिता घिमिरे, अर्घाखाँची जिल्लाका संन्धिखर्क ८ बस्ने ६६ बर्षीया सुनिता देवी भुसाल र अर्घाखाँचीकै मालारानी ७ बस्ने ३१ बषीय बसन्त घिमिरे घाइते भएका हुन् ।
घाइतेहरुको अवस्था मध्यम रहेको र उनीहरुको मध्यविन्दु जिल्ला अस्पताल डण्डामा उपचार भईरहेको प्रहरीले जनाएको छ । बस चालक प्रहरी नियन्त्रणमा रहेको छ ।
