नवलपरासीका निर्वतमान मेयरले जम्मा गरे सुविधाबापतको साढे १८ लाख

हरि शर्मा

परासी, २७ बैशाख ः पश्चिम नवलपरासीको सुनवल नगरपालिकाका निर्वतमान मेयर भीमबहादुर थापा(भरत) ले कार्यकाल अवधिभर पाएको तलब÷भत्ता र अन्य सुविधाबापतको रकम नगरपालिकामा जम्मा गरेका छन् । मेयर पदमा निर्वाचित भए लगत्तै उनले आफूले नगरपालिकाबाट कुनै पनि सुविधा नलिने घोषणा गरेका थिए ।

आफ्नो कार्यकालमा नगरपालिकामा भएका कामको प्रशंसा बटुलेका थापाले व्यक्तिगत लगानीबाट पनि अन्य सामाजिक क्षेत्रमा सहयोग गर्दै आएका थिए । तलब÷भत्ता र अन्य सुविधाबापत पाएको कुल १८ लाख ५१ हजार ४ सय २४ रुपैयाँ मेयर थापाले नगरपालिकाको संचीत कोष र दैविक प्रकोप उद्धार विषेश कोषमा जम्मा गरेको प्रमुख प्रशासकीय अधिकृत अशोक कोइरालाले बताए ।

जम्मा गरेको रकममा सेवा सुविधाबापतको १४ लाख ८६ हजार, दैनिक भ्रमण भत्ताबापतको १ लाख ४१ हजार ३ सय र बैठक भत्ताबापतको २ लाख २३ हजार रहेको नगरपालिकाले जनाएको छ ।

थापा नेपाली कांग्रेसबाट निर्वाचित भएका थिए । पार्टीले अहिले मेयरको उमेदवारमा जिल्ला सभापति अर्जुनकुमार पोखरेललाई उठाएको छ ।