पूर्वमन्त्री जोशीको मुद्दामा १२ वर्षपछि फैसला, ९ महिना कैद र ६९ लाख जरिवाना

गैरकानुनी सम्पत्ति आर्जन मुद्दामा पूर्वमन्त्री गोविन्दराज जोशी सर्वोच्च अदालतबाट दोषी ठहर भएका छन्। न्यायाधीशद्वय विनोद शर्मा र बालकृष्ण ढकालको इजलासले जोशीलाई दोषी ठहर गरेको हो।

यसअघि जोशीको तीन करोड ९३ लाख रुपैयाँभन्दा बढी सम्पत्तिको स्रोत नखुलेको दाबी गरिएको मुद्दामा विशेष अदालतले दुई करोड १६ लाख रुपैयाँभन्दा बढी सम्पत्तिको स्रोत वैध नरहेको ठहर गरेको थियो।

एक वर्ष ६ महिना कैद हुने विशेषको केही फैसला उल्ट्याउँदै सर्वोच्चले जोशीलाई ९ महिना कैद र ६९ लाख १५ हजार रुपैयाँ जरिवाना तोकेको छ। सर्वोच्च पुगेको १२ वर्षपछि यो मुद्दामा फैसला भएको हो।

यसै मुद्दाका प्रतिवादीहरू ताराराज पाण्डे, दिनेशराज जोशी र बासुदेव पन्तले भने सफाइ पाएका छन्। यी मुद्दाहरू ०६९ फागुनदेखि ०७० साउनसम्म दर्ता भएका थिए।