पाेखरा बस दुर्घटना : आमाछाेराकाे मृत्यु, २९ जना घाइते
पाेखरा । पोखराको एलपी देवकोटा मेमोरियल स्कुलको बस आज सोमबार दुर्घटनामा पर्दा घाइते भएकाहरुमध्ये २ जनाको निधन भएको छ ।
विद्यालयकी कार्यालय सहयोगी ३३ वर्षीया आरती विक र उनका ६ वर्षे छोरा प्रिन्स उपचारका क्रममा चिकित्सकले मृत घोषणा गरेको प्रहरीले जनाएको छ । प्रिन्स युकेजीमा पढ्थे । उनको गण्डकी मेडिकल कलेजमा उपचारकै क्रममा निधन भएको हो ।
दुर्घटनामा परी २९ जना घाइते भएका छन् । घाइतेमध्ये १४ जनाको गण्डकी मेडिकल कलेज, १२ जनाको पोखरा स्वास्थ्य विज्ञान प्रतिष्ठान र ३ जनाको मणिपाल शिक्षण अस्पतालमा उपचार भइरहेको कास्की प्रहरी प्रवक्ता डीएसपी वसन्तकुमार शर्माले बताएका छन् ।
सोमबार बिहान पोखरा २१ रामदीबाट बिरौटा फर्किने क्रममा ग १ क ६२१९ नम्बरको बस सडकदेखि करिब ५० मिटर तल खसेर दुर्घटना भएको हो ।
बसमा विद्यार्थी, चालक र सहचालक गरी ३० जना सवार थिए । घाइतेहरको अवस्था सामान्य रहेको प्रहरीले जनायो । अधिकांशको अनुहार, हातखुट्टा, ढाडमा चोट छ । बस ब्रेक फेल भएर दुर्घटना भएको प्रारम्भिक अनुसन्धानमा देखिएको कास्की प्रहरीले जनायो ।
