नवलपुरमा गएराति भएको सवारी दुर्घटनामा ३ जना घाइते
नवलपुर । नवलपुरमा गएराति भएको दुई छुट्टा छुट्टै दुर्घटनामा परी ३ जना घाइते भएका छन् ।
जिल्ला प्रहरी कार्यालय नवलपुरका प्रहरी नायव उपरीक्षक वेदबहादुर पौडेलका अनुसार गएराति मध्यविन्दु नगरपालिका १२ नयाँ बेलहानी स्थित भित्रसडक खण्डमा लु ३० प ९४७७ नम्बरको मोटरसाइकलले साइकल यात्रीलाई ठक्कर दिंदा २ जना घाइते भएका छन् ।
दुर्घटनामा परी मोटरसाइकल चालक भारत घर भई हाल नयाँ बेलहानी निवासी ४० बर्षीय सुनिल खाली र साइकल यात्री नयाँ बेलहानी निवासी २५ बर्षीय तिला कुमाल घाइते भएका छन् ।
घाइतेहरुको मध्यविन्दु अस्पताल डण्डामा उपचार गरी थप उपचारका लागि भरतपुर अस्पताल पठाइएको छ । घाइतेहरु दुवैको अवस्था गम्भीर रहेको छ ।
त्यसैगरी नवलपुरका हुप्सेकोट १ जुकेपानीमा लु ३८ प ५७६६ नम्बरको मोटरसाइकलको ठक्करबाट ना ६४ प १२५५ नम्बरको मोटरसाइकल चालक जुकेपानी निवासी ३७ बर्षीय चित्रबहादुर विक गम्भीर घाइते भएका छन् ।
उनको मध्यविन्दु जिल्ला अस्पतालमा समान्य उपचार पश्चात थप उपचारका लागि भरतपुर अस्पताल चितवन लगिएको छ । मोटरसाइकल प्रहरीको नियन्त्रणमा रहेको छ ।
