गैडाकोटमा सवारी दुर्घटनामा ७ जना घाइते
रामकुमार श्रेष्ठ –
नवलपुर । नवलपुरको गैडाकोटमा भएको दुई छुट्टा छुट्टै सवारी दुर्घटनामा परी ७ जना घाइते भएका छन् ।
जिल्ला प्रहरी कार्यालय नवलपुरका अनुसार गैडाकोट २ एसपिएम टोलको भित्री सडकमा बा.प्र. ३–००१ क ९५५ नम्बरको खाली टेलरसँग बा. प्र. ३ – ००१ ह १२३२ नम्बरको अटो ठक्कर खाँदा अटोमा सवार ५ जना घाइते भएका छन् । चालकले अटोको नियन्त्रण गुमाई अटो टेलरमा ठोक्किन पुगेको थियो ।
दुर्घटनामा परी अटो चालक गैडाकोट ६ निवासी ४२ बर्षीय सूर्यबहादुर तामाङ गम्भीर घाइते भएका छन् । उनको नयाँ मेडिकल कलेज भरतपुरमा उपचार भईरहेको छ ।
त्यसैगरी अटोमा सवार चितवनको भरतपुर महानगरपालिका १ निवासी ७८ बर्षीय डम्मर बहादुर गुरुङ, भरतपुर महानगरपालिका १ निवासी ६० बर्षीय गौरी माया गुरुङ, गैडाकोट ६ निवासी १७ बर्षीया सविना गुरुङ र १३ बर्षीय कुशल गुरुङ घाइते भएका छन् । उनीहरुको अवस्था मध्यम रहेको प्रहरीले जनाएको छ ।
घाइते ४ जनाको पुरानो मेडिकल कलेज भरतपुरमा उपचार भईरहेको छ ।
त्यसैगरी नवलपुरकै गैडाकोट नगरपालिका ५ कालिका टेक्निकल कलेज अगाडि भित्री सडक खण्डमा बा. प्र. ०३–००४ प ७६०२ नम्बरको मोटरसाइकल र ना ३३ प ९३३८ नम्बरको मोटरसाइकल एक आपसमा ठक्कर खाँदा दुई जना घाइते भएका छन् ।
दुर्घटनामा परी दुवै मोटरसाइकलका चालक घाइते भएका हुन् । दुर्घटनामा परी गैडाकोट ४ निवासी ३९ बर्षीय पदमराज शर्मा र गैडाकोट ८ निवासी ३० बर्षीय केशव चालिसे घाइते भएका छन् ।
