दाउन्नेमा सास्तीः १४ किलोमिटर पार गर्न १० घण्टासम्म कष्ट
रामकुमार श्रेष्ठ –
नवलपुर । पछिल्लो समय वुटवल नारायणगढ सडक खण्डको कामले तिब्रता पाएको छ । तर, दाउन्ने खण्डमा भने सडक विस्तारको काम शुरु गरेसँगै यात्रा कष्टकर बन्न पुगेको छ ।
दाउन्ने क्षेत्रमा निर्माण कम्पनीले यात्रुलाई सहज हुने ढंगले भन्दा पनि आफू अनुकुल काम गर्न सजिलो हुने गरी काम गर्दा यात्रुहरुलाई सास्ती हुने गरेको हो ।
दाउन्नेको १४ किलोमिटर सडक पार गर्न सामान्य अवस्थामा २ देखि ४ घण्टा लाग्ने गरेको र पछिल्लो केही दिन यता प्राय जसो १४ किलोमिटर पार गर्न ८ देखि १० घण्टा लाग्ने गरेको छ ।
ठाउँठाउँमा ठूलाठूला खाल्डाखुल्टी, १ देखि २ फिटसम्मको धुलाम्य सडक, कल्भर्ड निर्माणका लागि काम भएका अधिकांश ठाउँमा एकतर्फी यातायात सञ्चालन आदिले गर्दा दाउन्नेको यात्रा कष्टपूर्ण बनेको छ । जसले गर्दा यात्रुहरुलाई दाउन्ने पार गर्न निक्कै सास्ती हुने गरेको छ । दुई दिन अघि कावासोतीबाट बुटवल गएका रामप्रसाद श्रेष्ठले आफू जाँदा ९ र आउँदा ९ गरेर १८ घण्टा बाटोमा जाम परेको बताए ।
धुलो धुँवाले बाटो देख्नै गाह्रो हुने गरेको छ भने स्थानीयलाई धुलोले निक्कै सास्ती भएको स्थानीयले बताएका छन् ।
यसैबीच दाउन्नेमा बालुवा बोकेको टिपरको पट्टा भाँचिदा विहीबार विहान मात्रै ३ घण्टा सडक पूर्ण रुपमा अवरुद्ध हुन पुगेको छ ।
विनयी त्रिवेणी गाउँपालिका–२ घ्यू खोला नजिकै लु २ ख ४२५ नम्बरको टिपर बिग्रिँदा तीन घण्टासम्म सडक अवरुद्ध भएको जिल्ला प्रहरी कार्यालय पूर्वी नवलपरासीले जनाएको छ ।
सडक पूर्ण रुपमा जाम हुने र एकतर्फी रुपमा खुल्ने क्रम नियमित जस्तो भएकोले अहिले दाउन्नेमा २४ घण्टा नै ट्राफिक खटाउन परेको जल्ला ट्राफिक कार्यालय नवलपुरका कार्यालय प्रमुख जनक बन्जाराले बताए ।
सडक विस्तारको क्रममा रहेको यस सडक खण्डमा पहाड काट्ने, कल्भर्ट निर्माण जस्ता कामले हरेक दिन सवारी जाम हुने गरेको छ । साँघुरो सडकमा एउटा सवारी बिग्रिँदा पनि जाम हुने समस्याले यात्रुले सास्ती पाएका छ्न् ।
