नवलपुरमा विभिन्न स्थानमा भएको दुर्घटनामा ३ जना घाइते
नवलपुर । नवलपुरको विभिन्न स्थानमा भएको दुर्घटनामा परी ३ जना घाइते भएका छन् ।
नवलपुरको देवचुली १२ गैडीमा गएराति गण्डकी प्रदेश ०४ – ००१ प ४८७९ नम्बरको मोटरसाइकले पैदल यात्री गैडी निवासी २८ बर्षीय विष्णु महतोलाई ठक्कर दिएको छ ।
घाइते महतोको टाउको र कम्मरमा चोट लागेको छ । उनको देवचुली नगर अस्पतालमा सामान्य उपचारपछि थप उपचारका लागि देव अस्पताल भरतपुर पठाइएको नवलपुर प्रहरीले जनाएको छ ।
प्रहरीले ठक्कर दिने मोटरसाइकल र मोटरसाइकल चालकलाई नियन्त्रणमा लिएको छ ।
त्यसैगरी गएराति नै कावासोती १७ ढोकीमा कार र मोटरसाइकल ठक्कर खाँदा २ जना घाइते भएका छन् ।
ढोकीमा बा १९ च ६०७२ नम्बरको कार र लु ६२ प १३६५ नम्बरको मोटरसाइकल एक आपसमा ठक्कर खाँदा २ जना घाइते भएका हुन् ।
दुर्घटनामा परी मोटरसाइकल चालक कावासोती ८ निवासी ४० बर्षीय कमल वाग्ले र मोटरसाइकल पछाडि सवार कावासोती १७ निवासी ३६ बर्षीय जीवनाथ उपाध्याय घाइते भएका छन् । उनीहरुको कावासोती अस्पताल डण्डामा उपचार भईरहेको छ ।
कार र कार चालक प्रहरी नियन्त्रणमा रहेको प्रहरीले जनाएको छ ।
