मुना पाण्डे हत्या आरोपमा बबि सिंह पक्राउ परे, कारण अझै अस्पष्ट

अमेरिकाको टेक्सासस्थित ह्युस्टन शहरमा गोली हानी नेपाली विद्यार्थीको हत्या गरेको आरोपमा पक्राउ परेका व्यक्तिको विवरण प्रहरीले सार्वजनिक गरेको छ । ह्युस्टन प्रहरीले बिहीबार बेलुकी प्रेस विज्ञप्ति जारी गर्दै पक्राउ गरिएका व्यक्ति ५१ वर्षीय बबि सिंह शाह भएको बताएको छ । उनलाई प्रहरीले हत्या आरोपमा अनुसन्धान प्रक्रिया अघि बढाएको छ ।

प्रहरीले बुधबार मुना पाण्डेको हत्यामा संलग्न संदिग्धको क्लोज सर्किट (सीसी) टिभी फुजेटमा देखिएको तस्वीर सार्वजनिक गरेको थियो र उनलाई कसैले देखेको भए खबर गरिदिन अनुरोध गरेको थियो । यसको २४ घन्टा नवित्दै प्रहरीले शाहलाई नियन्त्रणमा लिएको हो । ह्युस्टन प्रहरीका प्रवक्ताका अनुसार, सीसी टीभीमा मुनाको अपार्टमेन्टबाट निस्किँदै गरेको देखिएका व्यक्ति शाह नै थिए ।

शाहलाई बुधबार अपराह्न ह्युटनको उत्तरपश्चिम क्षेत्रमा रहेको ट्राफिक स्टपबाट नियन्त्रणमा लिइएको प्रहरीले भनेको छ ।

हत्यामा संलग्नको खोजीका लागि स्वाट अफिसर, एचपीडी अपराध नियन्त्रण इकाइ र टेक्सास डिपार्टमेन्ट अफ पब्लिक सेफ्टीका अधिकारीहरु खटिएका थिए । त्यसक्रममा उनलाई ट्राफिक चेक पोइन्टमा फेला पारेपछि नियन्त्रणमा लिइएको प्रहरीले जनाएको छ ।

प्रहरीले हालसम्म हत्याको कारण भने खुलाएको छैन । हत्यामा प्रयोग भएको हतियार पनि बरामद भए नभएको बताएको छैन । मृतक युवती र शाहबीच चिनजान कसरी भएको थियो भन्ने पनि खुलेको छैन ।

२१ वर्षीया पाण्डेको अमेरिकी समयअनुसार, सोमबार बेलुकी साढे ५ बजे गोली हानी हत्या भएको थियो । खबर पाएलगत्तै प्रहरीसँगै घटनास्थलमा पुगेका स्वास्थ्यकर्मीले उनलाई मृत घोषित गरेका थिए । प्रहरीका अनुसार, उनको शरीरमा गोली प्रहारपछि थुप्रै चोटहरु छन् ।

मुना सन् २०२१ मा स्नातक तह अध्ययनका लागि अमेरिका गएकी थिइन् । विद्यार्थी भिसामा अमेरिका गएकी उनी ह्युस्टन कम्युनिटी कलेजमा अध्ययनरत थिइन् । स्थानीय एक स्टोरमा समेत उनी काम गर्दै आएकी थिइन् ।

मुनाकी साथी आरुसा निरौलाले आफ्नो साथीमाथि सोच्नै नसकिने घटना भएको भन्दै न्यायको माग गरेकी छन् । उनले फेसबुकमा पोष्ट गर्दै लेखेकी छन्, ‘मेरो प्रिय साथी, पूर्व रुममेट दुखद् रुपमा हामीबाट खोसिएकी छन्, यस्तो विभत्स रुपमा भएको साथीको हत्या सहन सक्ने किमिसको छैन ।’ प्रहरीलाई साँझ ५ः३५ बजे पहिचान हुन नसकेका व्यक्तिले फोन गरेर घटनाबारे जानकारी गराएको डेली मेलको अनलाइन संस्करणले जनाएको छ ।

पारिवारिक स्रोतलाई उदृत गर्दै अमेरिकाको नेपयोर्क पत्रिकाले उनी एक अमेरिकी नागरिकसँग प्रेम सम्बन्धमा भएको दाबी गरेको छ । ती व्यक्तिसँगको तस्वीर समेत उनले सामाजिक सञ्जालमा राखेको भनिएको छ । उनकी आमाका अनुसार, दुई दिनदेखि मुनाको मोबाइलमा सम्पर्क भइरहेको थिएन । मुनाको स्थायी थलो भोजपुर हो । उनकी आमा अहिले काठमाडौंमै बस्दै आएकी छन् ।