अस्ट्रेलियाद्वारा प्यालेस्टिनी राज्यलाई मान्यता दिने योजना घोषणा
सिड्नी । अस्ट्रेलियाले सेप्टेम्बरमा प्यालेस्टिनी राज्यलाई मान्यता दिने योजना घोषणा गरेको छ। यसअघि बेलायत, फ्रान्स र क्यानडाको यस्तै कदमको घोषणा गरेको थियो।
अस्ट्रेलियाका प्रधानमन्त्री एन्थोनी अल्बानीजले संयुक्त राष्ट्र संघको महासभामा यो कदम चालिने र प्यालेस्टिनी प्राधिकरणबाट प्रतिबद्धता प्राप्त भएपछि यो निर्णय गरिएको बताएका छन्। उनले भने, ‘मध्य पूर्वमा हिंसाको चक्र तोड्न र गाजामा द्वन्द्व, पीडा र भोकमरीको अन्त्य गर्न दुई-राज्य समाधान नै मानवताको लागि सबैभन्दा राम्रो आशा हो।’
इजरायलले भने प्यालेस्टिनी राज्यलाई मान्यता दिनुलाई ‘आतङ्कवादलाई पुरस्कार दिनु’ भनेको छ। गाजामा युद्ध अन्त्य गर्न इजरायलमाथि दबाब बढिरहेको छ।
शनिबारदेखि गाजामा भोकमरी र कुपोषणका कारण पाँच जनाको मृत्यु भएको छ, जसले गर्दा कुल मृतकको सङ्ख्या २१७ पुगेको छ । हमास-द्वारा सञ्चालित स्वास्थ्य मन्त्रालयले सन् २०२३ देखि इजरायलको सैन्य अभियानका कारण कुल ६१,००० भन्दा बढी मानिसको मृत्यु भएको पनि बताएको छ।
इजरायलले ७ अक्टोबरमा दक्षिणी इजरायलमा हमासको नेतृत्वमा भएको आक्रमणको जवाफमा आफ्नो कारबाही सुरु गरेको थियो, जसमा करिब १,२०० मानिस मारिएका थिए र २५१ जनालाई बन्धक बनाइएको थियो।
प्यालेस्टिनी प्राधिकरणले राज्यको मान्यताले आफ्ना जनताको आत्मनिर्णयको लागि बढ्दो समर्थन देखाएको बताएको छ।
प्रधानमन्त्री अल्बानीजले आफ्नो सरकारले प्यालेस्टिनी प्राधिकरणका अध्यक्ष महमूद अब्बासबाट भविष्यमा हमासको राज्यमा कुनै भूमिका नहुने प्रतिबद्धता प्राप्त गरेपछि यो निर्णय गरिएको बताएका छन्। उनले विगत दुई हप्तामा बेलायत, फ्रान्स, न्युजिल्याण्ड र जापानका आफ्ना समकक्षीहरूसँगको कुराकानीपछि यो निर्णय गरेको पनि जानकारी दिएका छन्।
