कोरोना विरुद्धको लडाईः नवलपुरमा ७ जना फर्किए, ३ जना थपिए

शुक्रवार स्वाव संकलन गरी परीक्षणका लागी पठाईएका १० स्वाव नमूनामध्ये ७ जनाको रिपोर्ट नेगेटिभ आएको हो । प्राकृतिक चिकित्सालयका निर्देशक डा. बिनोद पौडेलका अनुसार १० जनाको पुनः परिक्षणका लागी पठाईएका स्वाव नमूनामध्ये ७ जनाको नेगेटिभ आएको र ३ जनामा पुनः पोजेटिभ देखिएको छ ।

आज संक्रमणमुक्त भएको रिपोर्ट आएकासँगै प्राकृतिक आईशोलेशनबाट संक्रमणमुक्त हुनेको संख्या ३ सय २८ पुगेको छ ।

यस्तै सोमवार नवलपुरका ३ जनामा कोरोना भाईरस संक्रमण पुष्टि भएको छ । योसँगै नवलपुरमा कोरोना संक्रमितको कुल संख्या ३ सय ९६ पुगेको छ । स्वास्थ्य कार्यालय नवलपुरका प्रमुख केशवप्रसाद चापागाईका अनुसार भरतपुर प्रयोगशालामा भएको परिक्षणमा गैंडाकोटका २ जना र कावासोतीका १ जना गरी ३ जनामा संक्रमण पुष्टि भएको हो ।

संक्रमण पुष्टि हुनेहरुमा गैंडाकोट २ का ४२ बर्षका १ पुरुष र ३८ बर्षकी १ महिला तथा कावासोती १४ की २२ बर्षकी एक महिला छन् । स्वास्थ्य कार्यालय नवलपुरका अनुसार गैंडाकोटका संक्रमित मेडिकल कलेजमा उपचाररत बिरामीका कुरुवा आफन्त भएको जनाईएको छ ।