पाकिस्तानी विमान मलेसियाको कब्जामा !

767







क्वालालम्पुर । पाकिस्तान इन्टरनेशनल एयरलाइन्स (पीआईए) को एउटा ‘बोइङ्ग–७७७’ विमानलाई मलेसियाले कब्जामा लिएको छ । क्वालालम्पुर विमानस्थलमा मलेसियाली प्रशासनले उक्त पाकिस्तानी विमान कब्जामा लिएको हो । अधिकारीहरुका अनुसार मलेसियाको एउटा स्थानीय अदालतको आदेशअनुसार सो विमान कब्जा गरिएको हो ।


समाचार एजेन्सीहरुका अनुसार पीआईएले विमान भाडामा लिएबापतको रकम नबुझाएका कारण यस्तो कारवाही गरिएको हो । पीआईएले सन् २०१५मा भियतनामको एउटा कम्पनीसँग बोइङ्ग–७७७ विमान भाडामा लिएको थियो ।

पाकिस्तानी न्यूज च्यानल ‘जियो टिभी’ले जनाएअनुसार पाकिस्तानी सहर कराँचीबाट मलेसियाको क्वालालम्पुर पुगेको उक्त विमानलाई फर्कन नदिइ मलेसिया प्रशासनले कब्जामा लिएको हो । क्वालालम्पुरबाट पाकिस्तानतर्फ फर्कनका लागि विमान तयारी अवस्थामा रहेको र यात्रीहरुसमेत विमानमा चढिसकेको अवस्थामा उडान भर्न अनुमति नदिइएको हो ।

विमानलाई क्वालालम्पुर विमानस्थलमै रोकिएपछि विमानका चालक दलका १८ सदस्य पनि मलेसियामै बस्नुपरेको छ । कोभिड–१९ प्रोटोकलअनुसार चालक दलका सबै सदस्यले कम्तीमा १४ दिन क्वारेन्टिन बस्नुपर्ने जनाइएको छ ।

पीआईएले ट्वीटरमार्फत उक्त घटनाको पुष्टि गरेको छ । पीआईएका अनुसार मलेसियाको अदालतले एकतर्फी निर्णय सुनाएको आधारमा यो कारवाही गरिएको हो ।

एउटा अर्को ट्वीटमा पीआईएले लेखेको छ, ‘पीआईए र अर्को पक्षबीच लन्डनको एउटा अदालतमा मुद्दा चलिरहेको छ, यो एक कानुनी लडाइ हो, जो अझै जारी छ । तर मलेसियाली अदालतले एकतर्फी निर्णय सुनाएको छ, जुन स्थिति स्वीकार्न लायक छैन ।’

पीआईएले पाकिस्तान सरकारलाई यसबारे जानकारी गराइएको र कुटनीतिक स्तरमा कुरा उठाउन भनिएको पनि जानकारी दिएको छ । पीआईएका अनुसार उक्त विमानमार्फत पाकिस्तान आउन टिकट लिएका यात्रीहरुका सम्बन्धमा आवश्यक प्रवन्ध मिलाइएको पनि पीआईएले जनाएको छ ।


You might also like
Loading...