नारायणगढ–मुग्लिन खण्ड : सडक विस्तारपछि दुर्घटनामा कमी

85







भरतपुर । नारायणगढ–मुग्लिन खण्डमा सडक विस्तार भएपछि दुर्घटनाको संख्यामा कमी आएको छ । साँघुरो र भत्किएको सडक हुँदा यहाँ दुर्घटनाको जोखिम बढी थियो । चालू आर्थिक वर्ष ०७७/७८ को छ महिनामा नारायणगढ–मुग्लिन सडकमा १९ वटा सवारी दुर्घटना भएका छन् । दुर्घटनाबाट चार जनाको मृत्यु र ४४ जना घाइते भए ।


सडक विस्तार सम्पन्न भएको वर्ष यस सडकमा दुर्घटना अत्यधिक भएको थियो । यस सडकमा आव ०७५/७६ मा ५५ वटा दुर्घटना भएको थियो, जसमा २८ जनाले ज्यान गुमाए । १८७ जना घाइते भए । त्यसपछि आव ०७६/७७ मा ५७ वटा दुर्घटना भयो । दुर्घटनाबाट २४ जनाको ज्यान गयो भने १४४ जना घाइते भए ।

सडक विस्तार हुनुअघि आव ०७३/७४ मा ३०२ दुर्घटना हुँदा १७० जनाको मृत्यु भएको थियो । ८९ जना घाइते भएका थिए । त्यसपछिको आव ०७४/७५ मा चार सयवटा दुर्घटना हुँदा ९९ जनाको मृत्यु भएको थियो । सडक विस्तारका क्रममा नागरिकहरुले उस्तै सास्ती व्यहोर्नु परेको थियो ।

सडक विस्तारपछि नारायणगढ–मुग्लिन सडकमा दुर्घटनामा कमी आएको बागमती प्रदेश ट्राफिक प्रहरी कार्यालय रामनगर, चितवनका प्रमुख प्रहरी उपरीक्षक शान्तिराज कोइरालाले बताए । ‘सडक बनेपछि दुर्घटना र मृत्यु कम भएको छ’, कोइरालाले बुधबार पत्रकार सम्मेलन गरी भने, ‘फराकिलो र राम्रो सडक भयो भने दुर्घटना कम हुने रहेछ भन्ने यो उदाहरण हो ।’

अहिले पूर्वी चितवनमा दुर्घटनाको दर बढेको उनले बताए । पूर्व–पश्चिम राजमार्गअन्तर्गतको गोन्द्राङदेखि लोथरसम्मको सडक वैज्ञानिक नहुँदा अत्यधिक दुर्घटना बढेको उनको भनाइ छ । ‘वैज्ञानिक सडक छैन, साँघुरो छ । त्यसकारण पूर्वी चितवनमा अत्यधिक दुर्घटना हुन थालेको छ’, उनले भने, ‘दुर्घटनाबाट दैनिक एक÷दुई जनाको मृत्यु भइरहेको छ । हामीलाई टाउको दुखाइ बनिरहेको छ ।’ पूर्वी चितवनको राप्ती–५, भण्डारामा मंगलबार राति बस र ट्रक ठोक्किँदा एक जनाको मृत्यु भएको थियो ।

प्रदेशमा दुर्घटना र मृत्युदरमा कमी

बागमती प्रदेश ट्राफिक प्रहरी कार्यालय मातहतको १० जिल्लामा गत आव ०७६÷७७ मा भन्दा यस आव ०७७÷७८ मा दुर्घटनामा कमी आएको छ । कार्यालय मातहत काठमाडौँ, भक्तपुर र ललितपुरबाहेकका जिल्ला पर्छन् । प्रदेशमा यस आवको छ महिनामा ६७५ वटा सवारी दुर्घटना भए । दुर्घटनाबाट १४१ जनाको मृत्यु र एक हजार २०९ जना घाइते भए ।

सबैभन्दा धेरै चितवनमा २१७ वटा दुर्घटना हुँदा ५७ जनाको मृत्यु भएको बागमती प्रदेश ट्राफिक प्रहरी कार्यालय रामनगर, चितवनका प्रमुख प्रहरी उपरीक्षक शान्तिराज कोइरालाले बताए । गत आव ०७६÷७७ को छ महिनामा ४४८ वटा दुर्घटना हुँदा २६३ जनाको मृत्यु भएको थियो । यस आवको छ महिनामा मृत्युदरमा ४६ प्रतिशतले कमी आएको देखिन्छ । दुर्घटनाको संख्यामा ५० प्रतिशतले कमी आएको उनले बताए ।


You might also like
Loading...