कता गइन् गैंडाकोटकी विना ?
भरतपुर । असार १४ गतेदेखि बेपत्ता विना सापकोटा सोही दिन राति ८ बजे भाटभटेनीअगाडि हिँडिरहेको अवस्थामा सिसी क्यामेरामा देखिएकी छन् । युवतीका बुबा जयश्वर सापकोटाले क्यामेरामा देखिएको व्यक्ति छोरी भएको प्रहरीसमक्ष बताएका छन् । चितवन प्रहरी प्रमुख एसपी ओमप्रसाद अधिकारीले विनाको खोजी भइरहेको बताए ।
रोयल सेन्चुरीनजिक रहेको एक पसलको क्यामेराले उनी हिँडेर नारायणगढतर्फ गएको भिडियो खिचेको थियो ।
त्यसपछि कता गइन् भन्ने खोजी भइरहेको एसपी अधिकारी बताउँछन् । बजारका विभिन्न ठाउँमा सिसी क्यामेरा रहेकाले प्रविधिको सहायतामा खोजी कार्य चलिरहेको उनले बताए । ‘युवती केही हतारमा भएर दौडिएजस्तो गरी ओरालो लागेको देखिन्छ’, उनले भने, ‘पुलचोकसम्मको सिसी क्यामेरा हेर्ने, बुझ्ने गरेका छौँ तर थप कुरा फेला पार्न सकेका छैनौँ ।’
