विराटनगरमा रक्तश्राबका कारण सुत्केरीको मृत्यु

विराटनगरस्थित सप्तकोशी अस्पतालमा प्रसूति गराउन गएकी एक सुत्केरीको अत्यधिक रक्तश्रावका कारण मुत्यु भएको छ । विराटनगर–५ की २८ वर्षीया मेनुका अधिकारी कटुवालको मृत्यु भएको हो ।
चिकित्सकको लापरवाहीका कारण उनको मृत्यु भएको परिवारको आरोप छ ।
प्रसूतिका लागि गत शुक्रबार साँझ सप्तकोशीमा भर्ना गरिएकी अधिकारीको शनिबार डा. योगेन्द्र मिश्र नेतृत्वको चिकित्सक टोलीले शल्यक्रिया गरेको थियो ।
उनलाई थप उपचारका क्रममा धरानस्थित वीपी कोइराला स्वास्थ्य विज्ञान प्रतिष्ठानमा लगिएको थियो । उनको गएराति ९ बजे मृत्यु भएको हो ।
शल्यक्रियाका क्रममा नसा काटिएको कारण रक्तश्राव नरोकिएको धरानमा उपचारमा संलग्न चिकित्सकले जानकारी दिएको मेनुकाका श्रीमान महेश कटुवालले बताए ।
भिडियो एक्सरेबाट पेटमा रगत तथा विकार पदार्थ जमेको देखिएपछि त्यसलाई बाहिर निकाल्न चिकित्सकले दोस्रो पटक धरानमा पनि शल्यक्रिया गरेका थिए ।
अत्यधिक रक्तश्राव, पिसाव बन्द तथा पेट पोलेर सहनै नसक्ने अवस्था हुनुका साथै रक्तचाप समेत कम हुँदै गएपछि डा।मिश्रले नै सुत्केरी मेनुकालाई गत शनिबारराति धरान लैजान आग्रह गरेको परिवारको भनाइ छ।