चितवन: १७१ थपिए, १८१ मुक्त भए, दुईको मृत्यु, सक्रिय संक्रमित २ हजार ४०७
चितवन जिल्लामा पछिल्लो २४ घण्टामा १७१ जना कोरोना संक्रमित थपिएका छन्। स्वास्थ्य कार्यालय चितवनको तथ्यांकअनुसार संक्रमित हुनेमा भरतपुरका १३०, माडीका १२, रत्ननगर, राप्ती र खैरहनीका ८/८ जना, कालिकाका तीन र इच्छाकामनाका दुई जनामा संक्रमण देखिएको हो। यससँगै चितवनमा कोरोना संक्रमितको कुल संख्या २२ हजार ४७१ जना पुगेको छ।
कुल संक्रमितमध्ये दुई हजार ४०७ जना सक्रिय संक्रमितले उपचार गराइरहेका छन्। तीमध्ये पनि दुई हजार २२२ जना होम आइसोलेसनमा छन् भने अस्पतालको आइसोलेसन केन्द्रमा १८० जना छन्। यस्तै पाँच जना भने स्थानीय तहले सञ्चालन गरेको आइसोलेसन केन्द्रमा उपचाररत रहेका स्वास्थ्य कार्यालय चितवनकी जनस्वास्थ्य अधिकृत गीताञ्जली ढकालले बताइन्।
दुईको मृत्यु
चितवनमा बुधबार कोरोना संक्रमणका कारण दुई जनाको मृत्यु भएको छ। भरतपुर अस्पतालमा र खैरहनीको आइसोलेसन केन्द्रमा एक/एक जना संक्रमितको उपचारकै क्रममा मृत्यु भएको स्वास्थ्य कार्यालय चितवनले जनाएको छ। बुधबार दुई जनाले ज्यान गुमाएपछि चितवनमा कोरोना संक्रमणका कारण ज्यान गुमाउने कुल संख्या भने ३५६ पुगेको छ।
१८१ संक्रमणमुक्त
चितवनमा बुधबार एकैदिन १८१ जना कोरोना संक्रमित संक्रमणबाट मुक्त भएका छन्। यससँगै जिल्लामा संक्रमणमुक्त हुनेको संख्या १९ हजार ७०८ पुगेको छ।
