पश्चिम नवलपररासीमा फरक फरक मुद्दामा २४ जना फरार अभियुक्त पक्राउ
रामकरण अम्बेडकर –
परासी । पश्चिम नवलपररासीमा फरक फरक मुद्दामा बिभिन्न मितीमा फैसला भई सजाय तथा जरिवाना भएका २४ जना फरार रहेका अपराधीहरु लाई आईतवार प्रहरीले पक्राउ गरेको छ ।
नवलपरासी जिल्ला अदालतबाट बिभिन्न मितिमा फैसला भई कैद तथा जरिवाना तोकिई तत्काल सजाय भुक्तान नगरेका लागु औषध मुद्धाका १ जना, सवारी ज्यान मुद्धाका २ जना, कुटपिट मुद्धाका १७ जना, चोरी मुद्धाका २ जना, जाल साजी मुद्धाका १ जना र केहि सार्वजनिक अपराध मुद्धाका १ जना फरार अभियुक्तहरु जिल्ला प्रहरी कार्यालय तथा मातहत समेतबाट खटिएको प्रहरी टोलीले जिल्लाका बिभिन्न स्थानबाट पक्राउ गरेको प्रहरी नायब उपरिक्षक प्रेम बहादुर शाहीले जानकारी दिए ।
शाहीका अनुसार पक्राउ पर्नेमा लामो समय २१ बर्ष देखि फरार रहेका साथै अधिकतम ६ महिनासम्म कैद तथा २० हजार जरिवाना सम्म तोकिएका अभियुक्त पनि छन् ।
नवलपरासी जिल्ला अदालतको लगत अनुसार पक्राउ परेका २४ जना अभियुक्तहरुको जम्मा सजाय १ बर्ष ५ महिना ३० दिन कैद र ५१ हजार ९ सय ५५ रुपैयाँ जरिवाना रहेको छ ।
पक्राउ गरिएका सबै २४ जना फरार अभियुक्तहरुलाई आवश्यक कारवाहीको लागि पुस ४ गते नवलपरासी जिल्ला अदालतमा पेश गरिएको रअदालतको लगत अनुसारको कारबाही भएको जिल्ला प्रहरी कार्यालयका सुचना अधिकारीले बताए ।
