कालीगण्डकी करिडोर नवलपुरमा ३ ठाउँमा सडक अवरुद्ध
रामकुमार श्रेष्ठ –
नवलपरासी । कालीगण्डकी करिडोर अन्तरगत नवलपुर खण्डमा ३ ठाउँमा सडक अवरुद्ध भएको छ ।
जिल्ला प्रहरी कार्यालय नवलपुरका अनुसार बौदीकाली १ जरेबर, गैडाकोट नगरपालिका ३ हिँदे खोला र बुलिङटार २ मतेडाँडामा सडक अवरुद्ध भएको छ ।
बौदीकाली १ जरेबर र गैडाकोट ३ हिउँदेखोलामा माथिबाट पहिरो खसेर सडक अवरुद्ध भएको र बुलिङटार २ मतेडाँडामा लेदो बगेको कारण सडक अवरुद्ध भएको जिल्ला प्रहरी कार्यालय नवलपुरका प्रहरी नायव उपरीक्षक वेदबहादुर पौडेले बताए ।
अवरुद्ध सडक खुलाउने प्रयास भईरहेको र सडक खुल्न कम्तीमा ४÷५ घण्टा लाग्ने प्रहरीले जनाएको छ ।
यता बुटवल नारायणगढको नवलपुर खण्डमा भने सडक अवरुद्ध नरहेको प्रहरीले जनाएको छ ।
त्यसैगरी नवलपुरको बौदीकाली २ गुरौटार निवासी ५५ बर्षीय सन्तबहादुर विकको कच्ची घर अविरल बर्षाले १ मिटर भासिएको छ ।
घरमा रहेका सन्तबहादुर र उनकी श्रीमतीलाई सुरक्षित स्थानमा स्थानान्तरण गरिएको प्रहरीले जनाएको छ ।
