गैडाकोटमा छुट्टाछुट्टै सवारी दुर्घटनामा ३ जना घाइते
गैडाकोट । नवलपुरको गैडाकोटमा भएको छुट्टाछुट्टै सवारी दुर्घटनामा परी ३ जना घाइते भएका छन् ।
जिल्ला प्रहरी कार्यालय नवलपुरका अनुसार आज विहान १० बजेतिर बसबाट झर्ने क्रममा गैडाकोट १४ अमरापुरीमा गैडाकोट १४ भेलेन्टाँडी निवासी ५५ बर्षीय पुरुष रामभक्त आचार्य घाइते भएका छन् ।
नारायणगढबाट कावासोतीको डण्डाको लागि छुटेको ना ७ ख १५५४ नम्बरको बसमा सवार यात्रु बसबाट झर्ने क्रममा लडेर घाइते भएका र उनको नयाँ मेडिक कलेज भरतपुरमा उपचार भईरहेको प्रहरीले जनाएको छ । उनको स्वास्थ्य अवस्था मध्यम रहेको प्रहरीले जनाएको छ ।
त्यसैगरी गैडाकोट ५ काँग्रेस चोकमा ट्रकले साइकलले ठक्कर दिंदा एक जना साइकल यात्री घाइते भएका छन् ।
बा.प्र. ००३–००१ ख २२०७ नम्बरको मकै लोड गरेको ट्रकले ओभरट्याक गर्ने क्रममा साइकललाई ठक्कर दिएको थियो ।
दुर्घटनामा परी साइकलमा सवार गैडाकोट २ निवासी लोकनाथ सापकोटाको ११ बर्षीय छोरा शशांक सापकोटा घाइते भएका छन् ।
त्यसैगरी गैडाकोटकै कालिका चोकबाट गणेशमन्दिर जाँदै गरेको ना ४५ प ४२५ नम्बरको मोटरसाइकल अनियन्त्रित भई सडक छेउ पर्खालमा ठक्कर खाँदा मोटरसाइकल चालक गैडाकोट ७ गैह्री निवासी २२ बर्षी कुसल सुवेदी घाइते भएका छन् ।
उनको गैडाकोट सामुदायिक अस्पताल गैडाकोटमा उपचार भईरहेको इलाका प्रहरी कार्यालय गैडाकोटले जनाएको छ ।
