एमाले महाधिवेशन प्रतिनिधि छनौटः गण्डकी प्रदेश सांसद लक्ष्मणबहादुर पाण्डे पराजित
रामकुमार श्रेष्ठ –
नवलपुर । नेकपा एमालेको केन्द्रिय प्रतिनिधि छनौटको क्रममा नवलपुरमा गण्डकी प्रदेश सभा सदस्य लक्ष्मण बहादुर पाण्डे पराजित भएका छन् ।
केन्द्रिय प्रतिनिधिका लागि नवलपुर क्षेत्र नं. २ बाट खुल्लातर्फबाट उम्मेदवारी दिएका पाण्डे ३ सय ४० मत प्राप्त गर्दै पराजित भएका हुन् । ८ जना उम्मेदवार मध्ये उनी अन्तिम २ मा परेका थिए ।
नवलपुर २ बाट खुल्लातर्फ मध्यविन्दु नगरपालिकाका नगर प्रमुख भिमलाल अधिकारी, बाबुराम पाण्डे र रोशन थापा निर्वाचित भएका छन् ।
त्यसैगरी नवलपुर २ बाट युवातर्फ कृष्ण गैरे, महिलातर्फबाट कावासोती नगर उपप्रमुख फूलकुमारी थनेत र र बालु पुरी निर्वाचित भएका छन् ।
त्यसैगरी नवलपुर क्षेत्र नं. १ बाट खुल्लातर्फ ४ जना प्रतिनिधिका लागि भएको १२ जनाको उम्मेदवारी परेकोमा गण्डकी प्रदेश सभा सदस्य एवम् पूर्व मन्त्री रोशनबहादुर गाहा, एमाले पूर्व जिल्ला अध्यक्ष मुक्तिराम पाण्डे, नेकपा एमाले नवलपुर जिल्ला सचिव भिमलाल कंडेल र नरदेव न्यौपाने निर्वाचित भएका छन् ।
यहाँ महिलातर्फ देवचुली नगरपालिका उपप्रमुख पार्वता तिवारी र विजयी भएका छन् भने युवातर्फ बुलिङटार गाउँपालिका अध्यक्ष दिपेन्द्र सुनारी मगर विजयी भएका छन् ।
दलिततर्फ जिल्ला समन्वय समितिका प्रमुख बाबुराम विक निर्विरोध निर्वाचित भएका हुन् । एमाले जिल्ला अध्यक्ष जीवन श्रेष्ठले उम्मेदवारी दिएनन् ।
पश्चिम नवलपरासीबाट पूर्व समानुपातिक प्रदेश सभा सदस्य भगवती भण्डारी, पूर्व राष्ट्रिय सभा सदस्य रामलखन हरिजन, बर्दघाट नगरपालिकाका पूर्व नगरप्रमुख धिरज शर्मा बस्याल पराजित भएका छन् ।
