एमाले प्रतिनिधि छनौटः नवलपरासीमा पूर्व नगरप्रमुखदेखि राष्ट्रिय सभा सदस्यसम्म पराजित
रामकुमार श्रेष्ठ –
नवलपरासी । पश्चिम नवलपरासीमा एमाले महाधिवेशन प्रतिनिधि छनौटमा पूर्व नगरप्रमुखदेखि पूर्व प्रदेश सभा सदस्य, पूर्व राष्ट्रिय सभा सदस्य सम्म पराजित भएका छन् ।
पश्चिम नवलपरासीबाट पूर्व समानुपातिक प्रदेश सभा सदस्य भगवती भण्डारी, पूर्व राष्ट्रिय सभा सदस्य रामलखन हरिजन, बर्दघाट नगरपालिकाका पूर्व नगरप्रमुख धिरज शर्मा बस्याल पराजित भएका हुन् ।
नेकपा एमाले पश्चिम नवलपरासीमा केन्द्रीय महाधिवेशनका लागि प्रतिनिधि छनोट सर्वसम्मत नभए पछि भएको निर्वाचनबाट ११ जना प्रतिनिधि छनोट गरिएको एमालेले जनाएको छ ।
नवलपरासीको क्षेत्र नम्बर १ र २ बाट ५/५ जना र एक जना दलित गरी ११ जना प्रतिनिधि छानिएको हो ।
जिल्लामा एमालेका संगठित सदस्य ३ हजार ८४४ छन् । जसमध्ये दुवै क्षेत्रमा जम्मा २ हजार ४ मत खसेको एमालेले जनाएको छ । क्षेत्र नम्बर १ मा ९ सय ७२ र क्षेत्र नम्बर २ मा १ हजार ३२ मत खसेको हो ।
सम्पन्न प्रतिनिधि छनोटको निर्वाचनमा क्षेत्र नम्बर १ बाट खुल्ला पुरुषतर्फ पूर्व संसाद दिपेन्द्रकुमार अधिकारी र हरिदेव पाण्डे निर्वाचित भएका छन् । महिलातर्फ इन्द्रदेवी थरुनी र राधा ढकाल निर्वाचित हुँदा युवातर्फ सुधा ज्ञवाली भएका छन् ।
यस्तै क्षेत्र नम्बर २ मा खुल्ला पुरुषतर्फ डोलराज भण्डारी र धानप्रसाद गैरे निर्वाचित हुँदा महिलातर्फ लक्ष्मी क्षेत्री र शान्ता भण्डारी निर्वाचित भएका छन् । युवातर्फ विनोद पुन निर्वाचित भए । जिल्लाबाट एकजना मात्रै दलित प्रतिनिधिमा तुलसी पासी निर्वाचित भएको निर्वाचन आयोगका संयोजक युवराज डुम्रेले जानकारी दिए ।
