सरकारी जग्गा कीर्ते गरी बेचेको अभियोगमा ७ जनाविरुद्ध मुद्दा

0 44







परासी, १३ कात्तिक ।

अख्तियार दुरुपयोग अनुसन्धान आयोगले सार्वजनिक जग्गा कीर्ते कागजात गरी भ्रष्टाचार गरेको अभियोगमा जिल्ला मालपोत कार्यालय, परासीका कर्मचारीसहित सात जनाविरुद्ध विशेष अदालतमा मुद्दा दायर गरेको छ । आयोगका अनुसार परासीको साविक जयखानी–३ गुल्मीका दीपक सुनारले साविक तिलकपुर गाविस–५ हाल सरावल गाउँपालिका–१ को सार्वजनिक जग्गा कीर्ते कागजात तयार गरी लुम्बिनी ग्यास उद्योगलाई बेचबिखन गरेको पाइएको छ ।

आयोगका प्रवक्ता रामेश्वर दङ्गालका अनुसार मालपोत कार्यालय परासीका मालपोत अधिकृत मनोहरप्रसाद पन्थी, खरिदार जीवलाल भुसाल र कम्प्युटर अपरेटर एजाज खाँले रु दुई करोड ८६ लाख ५२ हजार बराबरको भ्रष्टाचार गरेको अनुसन्धानबाट खुल्न आएको छ । मालपोत कार्यालय परासीका कर्मचारीसमेतको मिलेमतोमा सरकारी, सार्वजनिक प्रकृतिको जग्गा व्यक्ति विशेषको नामबाट अमुक कम्पनीको नाममा बिक्री वितरण गर्ने प्रयोजनका लागि राजीनामाको लिखत तयार गरी पारितसमेत गरेको अध्ययनबाट देखिएको छ । उक्त जग्गाको मालपोत कार्यालय परासीको आर्थिक वर्ष २०७४/७५ को न्यूनतम् सरकारी मूल्याङ्कन पुस्तिका अनुसार प्रतिकट्ठा रू पाँच लाख २० हजारको दरले गैरकानूनी रूपमा व्यक्ति विशेषको नाममा कम्प्युटरमा प्रविष्ठ गरी नक्कली स्रेस्ता, पूर्जा खडा गरी कार्यालयमा रहेको मोठ ठेलीमा घुसाएको पाइएको छ ।

स्थानीय वडा कार्यालयको घर बाटो सिफारिससमेत केरमेट गरी गराई त्यसका आधारमा हक हस्तान्तरणका लागि राजीनामाको लिखत पारित गरेको, आफ्नो पदको दुरुपयोग गरी बद्नीयतपूर्वक सरकारी, सार्वजनिक सम्पत्ति हानि नोक्सानी पुर्याएको आयोगको दाबी छ । यस्तै सार्वजनिक जग्गा बिक्री वितरण गरी भ्रष्टाचारजन्य कार्य गर्ने दीपक सुनार, बिक्री वितरण गराउने कार्यमा प्रत्यक्षरूपमा संलग्न यादवप्रसाद भण्डारीविरुद्ध पनि विशेष अदालतमा मुद्दा दायर गरेको छ । आयोगले लुम्बिनी ग्यासका प्रतिनिधि सुरेन्द्रराज पौड्याल र प्रत्यक्ष संलग्न सुदन श्रेष्ठविरुद्धसमेत मुद्दा दायर गरेको छ ।

You might also like
Loading...