‘जात्रै जात्रा’ को ट्रेलर सार्वजनिक
‘जात्रा’ र ‘शत्रु गते’ मार्फत् आफूलाई सफल निर्देशकको रुपमा चिनाएका प्रदीप भट्टराई निर्देशित नयाँ फिल्म ‘जात्रै जात्रा’ को ट्रेलर सार्वजनिक भएको छ । ट्रेलरमा कमेडी हाबी छ । अभिनेता दयाहाङ राई हराएको सुन खोज्दै देखिएका छन् । भने, विपिन कार्की, रबिन्द्र झा र रबिन्द्र सिंह बाँनिया सुन लुकाउन संघर्ष गरिरहेका छन् । ट्रेलरमा रबिन्द्रले बोलेका संवादहरु रमाइला छन् । फिल्म जेठ ३ गतेबाट मुलुकभर प्रदर्शनमा आउँदैछ ।
यो फिल्म करीब २ वर्ष अगाडि प्रदर्शनमा आएको फिल्म ‘जात्रा’ को सिक्वेल हो । दुई फिल्मको कथामा खासै भिन्नता देखिन्न । पहिलो भागमा भेटाएको पैसा लुकाउन पात्रहरुले गर्ने संघर्षको कथा थियो । ‘जात्रै जात्रा’ मा भेटाएको सुन लुकाउन र धनी बन्ने लोभमा फिल्मका प्रमुख पात्रहरु देखिएका छन् । यद्यपि, ट्रेलर इङ्गेजिङ छ । ट्रेलरले फिल्मको राम्रो हाइप निर्माण गर्ने आशा गर्न सकिन्छ । यो फिल्मको ‘माया पिरती’ गीत अहिले चर्चामा छ ।
सार्वजनिक ट्रेलरमा अभिनेत्री वर्षा राउत, कलाकार राजाराम पौडेललाई पनि राम्रो ‘स्क्रिन स्पेश’ मिलेको छ । यो फिल्मका कार्यकारी निर्माता रविन्द्र सिंह बनियाँ हुन् । फिल्ममा यज्ञश्वर पौडेल र सिंगे लामाको लगानी छ । मित्र डि. गुरुङको सम्पादन रहेको फिल्मलाई शिवराम श्रेष्ठले खिचेका हुन् । हिट फिल्म ‘जात्रा’ को सिक्वेल भएका कारण यो फिल्मप्रति दर्शकमा निकै ठूलो अपेक्षा छ ।
यस फिल्ममा प्रकाश घिमिरे, अञ्जु महर्जन, सोहित मानन्धर, सुस्मिता कार्की, प्रेम पाण्डे, प्रियंका झालगायतका कलाकारहरुको पनि अभिनय छ । यसमा शंकर महर्जन द्वन्द्व निर्देशन छ । निर्देशक भट्टराई आफैंको कथा रहेको फिल्ममा कालीप्रसाद बाँस्कोटा र कृष्ण भारद्वाजको संगीत छ । ट्रेलरबाट फिल्ममा अभिनेता दयाहाङ नेगेटिभ रोलमा हुनसक्ने अनुमान लगाउन गाह्रो पर्दैन । उनी यो फिल्मको अघिल्लो पार्टमा थिएनन् ।
