मन्त्रीको तस्बीरमा जुत्ता हान्ने चार जना पक्राउ
मन्त्रीको तस्बीरमा जुत्ता प्रहार गरेपछि जनकपुरको जिराेमाइलबाट चार जनालाई प्रहरीले पक्राउ गरेको छ । पक्राउ पर्नेमा स्थानीय विमलेश चौधरी, शंकर साह, रोशनसिंह राजपुत र रोशन ठाकुर रहेका छन् ।
पक्राउ परेकामध्ये राजपुत राजपा युवा संघका अध्यक्ष हुन् । उपभोक्ता समितिले काम गरे पनि पैसा नदिएपछि आक्रोशित बनेकाहरूले विरोधको नयाँ शैली अपनाएका थिए । उनीहरूले चाेकमा मन्त्रिहरूकाे तस्बीरसहितकाे ब्यानर राखेर तथानाम गाली गर्दै जुत्ता हानिरहेका थिए । जुत्ता हान्दै विराेध गरिरहेकै स्थानबाट प्रहरीले पक्राउ गरेको हाे ।
पक्राउ परेकाहरुलाई जिल्ला प्रहरी कार्यालय धनुषामा राखिएको छ । प्रदेश २ का मन्त्रीहरूको तस्बीर टाँसेर उनीहरूले विरोध गरिरहेका थिए । गत आर्थिक वर्षको ८६ करोड रुपैयाँ भुक्तानी हुन बाँकी रहेको छ । भुक्तानी नदिएको भन्दै उपभोक्ता समितिमा आवद्ध उनीहरू आन्दोलनमा उत्रेका हुन् ।
सार्वजनिक स्थानमा मन्त्रीहरूको तस्बीर टाँसेर जुत्ता हानेको आरोपमा प्रहरीले चारै जनालाई पक्राउ गरेको बताएकाे छ । आर्थिक वर्षको अन्त्यमा योजनाका काम लिएका अधिकांश समिति राजनीतिक दलका कार्यकर्ताका थिए । भुक्तानीकै विषयलाई लिएर प्रदेशसभा बैठक पनि अवरुद्ध बनेको छ ।
