म पार्टी बैठकमा बस्न नसक्ने परिस्थिति निर्माण भएको छ : कोइराला
नारायण शर्मा –
नवलपरासी — कांग्रेस महामन्त्री शशांक कोइरालाले बन्दै गएको एकता पार्टी नेतृत्वको पछिल्लो कदमले बिथोलेको बताएका छन् । उनले शुक्रबार सभापति शेरबहादुर देउवालाई लिखित पत्र बुझाउँदै विधानमा तोकिएबाहेकका विभाग बनाएर तथा केन्द्रीय समितिमा सदस्य र आमन्त्रित सदस्य मनोनयन गरेर पार्टीभित्र एकताको वातावरण बिथोलेको आरोप लगाएका छन् ।
नवलपरासी (बर्दघाट सुस्ता पश्चिम) जिल्लाका कार्यवाहक सभापति अर्जुन पोखरेललाई हटाउने पछिल्लो निर्णयबाट असन्तुष्ट कोइरालाले आफ्नो समूहको सुझावमा देउवालाई लिखित पत्र बुझाएर निर्णय सच्याउन पनि आग्रह गरेका छन् । उनले विधानको व्यवस्थाको बुँदागत व्याख्या गर्दै पोखरेललाई हटाउने निर्णय अवैधानिक रहेको दाबी गरेका छन् ।
देउवाले गत फागुन २२ गते पोखरेललाई हटाएर विष्णुप्रसाद पौडेललाई सभापति तोकेका थिए । पोखरेल कोइराला र पौडेल देउवानिकट हुन् । ‘राजनीतिक रूपमा यो कार्यले गम्भीर सांगठनिक विवाद सिर्जना गरेको छ,’ कोइरालाले बुझाएको पत्रमा उल्लेख छ ।
कोइरालाले मौखिक रूपमै निर्णय सच्याउन आग्रह गरेका थिए तर देउवाले नमानेपछि पत्र बुझाएका हुन् । ‘आमनिर्वाचनपछि उत्पन्न विवादबाट पार्टीलाई थप क्षति नहोस् भनेर मैले धेरै साथीको आलोचना सहँदै सभापतिज्यूलाई सहयोग गरेको हुँ,’ कोइरालाले पत्रमा लेखेका छन्, ‘तर पार्टीभित्र विवाद बढ्दै जाँदा केन्द्रीय कार्यसमितिका पछिल्ला केही बैठकमा म पनि सहभागी हुन नसक्ने परिस्थिति निर्माण भएको छ ।’ उनले बैठकमा सहभागी हुने वातावरण निर्माण गर्न छलफल र कुराकानी भइरहेका बेला केन्द्रीय विभागको गठन, केन्द्रीय सदस्य र आमन्त्रित सदस्यको मनोनयन गरेर विवाद बढाएको बताएका छन् ।
१४ औं महाधिवेशनको तालिका तोकेर प्रक्रिया अघि बढिसकेको अवस्थामा एकांगी रूपमा हुने निर्णयले महाधिवेशनको निष्पक्षता र सुनिश्चितता प्रभावित हुने कोइरालाले जनाएका छन् । ‘महाधिवेशन हामी सबैको साझा आयोजना हो । यो सर्वोच्च आयोजनामा पार्टीका सबै साथीको उत्साहपूर्ण सहभागिता आवश्यक पर्छ,’ उनले भनेका छन् ।
कोइरालाले सभापतिको काम, कर्तव्य र अधिकार पार्टीको आदर्श, सिद्धान्त र मर्यादालाई उच्च राख्न केन्द्रित हुनुपर्नेमा जोड दिएका छन् । ‘देशमा सबै राजनीतिक पार्टी र आमनागरिकसामु कांग्रेसको सञ्चालन पद्धतिलाई अनुकरणीय रूपमा कायम राख्नु हामी सबैको कर्तव्य हो,’ उनले भनेका छन् ।
नेता रामचन्द्र पौडेल, महामन्त्री कोइराला समेतले आफूलाई पदच्यूत गर्ने देउवाको निर्णयमा असहमति राखेर ध्यानाकर्षण पत्र बुझाइएको काठमाडौंमै रहेका पार्टी सभापति अर्जुन पोखरेलले टेलिफोनमा जानकारी दिए । उनले सभापति देउवाको लहडका भरमा कसैको राजनीति समाप्त पार्ने खेलमा लाग्ने विषय सोच्न पनि नसकिने दाबी गरे ।
पश्चिम नवलपरासीका २ दर्जनभन्दा बढी नेताहरु देउवाले पार्टी सभापति फेरेको विषयमा असहमति जनाउँदै काठमाडौंमा महामन्त्री निवासमा धर्ना दिएका छन् । बहुमत जिल्ला नेताहरु पोख्रेलकै पक्षमा देखिएका छन् । पश्चिम नवलपरासीका सांसद तथा कांग्रेसका केन्द्रीय सदस्य देवेन्द्रराज कँडेलको इसारामा देउवाले महामन्त्री निकट पोखरेलले सम्हाल्दै आएको पार्टी सभापतिको जिम्मेवारी खोसेर अर्का पुराना नेता विष्णु पौडेललाई सुम्पेको जिल्ला नेता कुलदीप आचार्यले दाबी गरे ।
