कावासोतीमा ७ दिने नेपाल भाषा तालिम
नवलपुर । नेवाः देय् दबू नवलपुरको आयोजनामा भएको नेपाल भाषा तथा आदिवासी जनजातिका अधिकारका सवाल विषयक ७ दिने तालिमको आज समापन गरिएको छ ।
कावासोती ३ को वडा कार्यालयको सभा हलमा भएको तालिममा ५० जना भन्दा बढी नेवाः समुदायका बालबालिका, युवायुवती तथा जेष्ठनागरिकहरुको सहभागिता रहेको थियो ।
तालिममा नेपाल भाषाको विषयमा निरञ्जन हाडा, गोविन्द कृष्ण श्रेष्ठ, आदिवासी जनजातिका अधिकारका सवालमा राम तामाङ ब्लोन, पृतम भुजेल लगायतले प्रशिक्षण दिएका थिए ।
तालिमको आज नेवाः देय दबू केन्द्रिय उपाध्यक्ष हरिकुमार श्रेष्ठको प्रमुख आतिथ्यतामा समापन गरिएको छ । तालिममा बोल्दै उपाध्यक्ष श्रेष्ठले भाषा सिक्नु मात्रै भन्दा पनि घरमा दिनानुदिन अभ्यास गरे मात्र पूर्ण रुपमा सिक्न सकिने बताए ।
कार्यक्रममा नेवाः देय दबु गण्डकी प्रदेश वरिष्ठ उपाध्यक्ष भुवराज श्रेष्ठ, प्रदेश कोषाध्यक्ष सूर्यकुमार श्रेष्ठ, देवचुली नगर अध्यक्ष रामकृष्ण श्रेष्ठ लगायतले आआफ्नो धारणा राखेका थिए ।
कार्यक्रममा नेवाः देय दबू गण्डकी प्रदेशमा नवलपुरबाट हालै निर्वाचित वरिष्ठ उपाध्यक्ष भुवराज श्रेष्ठ, कोषाध्यक्ष सूर्यकुमार श्रेष्ठ, सदस्य कृष्णकुमार श्रेष्ठ र महिला सदस्य कमला श्रेष्ठलाई सम्मान समेत गरिएको नेवाः देय दबू नवलपुरका सचिव रामकुमार श्रेष्ठले बताए ।
तालिमको समापन कार्यक्रम जिल्ला अध्यक्ष मित्रलाल श्रेष्ठको अध्यक्षतामा भएको थियो ।
त्यसैगरी तालिम पछि बसेको नेवाः देय् दबू नवलपुरको वैठकले नेवाः देय दबूको कावासोतीमा जेठ २, ३ र ४ गते हुने महाधिवेशन सफल पार्न जिल्लाबाट सक्रिय सहभागिता जनाउनृे निर्णय गरेको छ । त्यसैगरी महाधिवेशनका लागि ५१ सदस्यीय व्यवस्थापन समिति समेत गठन गरिएको छ ।
