मोटरसाइकल नहरमा खस्दा डुबेर एकको मृत्यु
सुनसरीको रामधुनी नगरपालिका–२ हसनपुरमा मोटरसाइकल नहरमा खस्दा डुबेर मोटरसाइकल चालकको मृत्यु भएको छ ।
कच्ची सडकखण्डमा पूर्वबाट पश्चिमतर्फ जाँदै गरेको को १७ प ३२४५ नम्बरको मोटरसाइकल अनियन्त्रित भएर बुधबार साँझ ७ः४० बजेतिर नहरमा खसेको थियो ।
मोटरसाइकल नहरमा खसेपछि पानीमा डुबेर चालक रामधुनी–८ का ४३ वर्षीय धु्रवकुमार चौधरीको मृत्यु भएको प्रहरीले जनाएको छ ।
नहरबाट निकालेर चौधरीको शव पोस्टमार्टमका लागि बिपी कोइराला स्वास्थ्य विज्ञान प्रतिष्ठान धरान लगिएको छ ।
मोटरसाइकल इलाका प्रहरी कार्यालय पकलीमा राखिएको छ ।
तीव्र गतिका कारण दुर्घटना भएको प्रहरीले जनाएको छ ।
