पश्चिम नवलपरासीका मतगणनास्थलमा तारजाली र सीसी क्यामेरा जडान
परासी — स्थानीय तह निर्वाचनको मतगणनाका लागि पश्चिम नवलपरासीमा तारजालीसहित सीसी क्यामेरा जडान गरिएको छ । मतपत्र सुरक्षाका लागि तारजालीसहित क्यामेरा जडान गरिएको हो ।
सरकारी कर्मचारीबाहेक दलका प्रतिनिधि र उम्मेदवारलाई जाली बाहिर राख्ने र निर्वाचनमा खटिएका कर्मचारीमात्र तारजालीभित्र रहने गरी व्यवस्था मिलाइएको छ । मतदानदेखि मतगणना तयारीका लागि आवश्यक कर्मचारी र भौतिक संरचना निर्णको काम अन्तिम चरणमा पुगेको पाल्हिनन्दन गाउँपालिकाका सहायक निर्वाचन अधिकृत श्रीप्रसाद गौतमले बताए ।
‘मतपत्र सम्बन्धित मतदान केन्द्र र स्थलमा पुगिसकेको छ,’गौतमले भने ‘पाल्हिनन्दन गाउँपालिकामा पनि तारजालीसहितको गणनास्थल तयार भएको छ । ’
जिल्लाको सुनवल, रामग्राम, बर्दघाट नगरपालिका र पाल्हिनन्दन, प्रतापपुर, सुस्ता, सरावल गाउँपालिकामा तारजाली र सीसी क्यामेरा जडान गरिएको छ । मतगणनास्थलमा निर्वाचनमा खटिएका कर्मचारी मतपत्रको सुरक्षाका लागि तारजालीभित्र रहने छन् भने दलका प्रतिनिधि र अन्य प्रतिनिधि जाली बाहिरका घेरामा बसेर मतगणना हेर्नेछन् ।
जिल्लाको सातवटै स्थानीय तहमा मतगणनाको लागि सम्बन्धित गाउँपालिकाको केन्द्रमा नै व्यवस्था मिलाइएको छ ।
२०७४ सालको स्थानीय निर्वाचनमा भरतपुरमा मतगणनाको क्रममा मतपत्र च्यातेको घटनापछि निर्वाचन आयोगले तारजालीभित्र मतगणना गर्दै आएको छ । जिल्लामा २ सय ८३ मतदान केन्द्र र १ सय २१ मतदान स्थल रहेका छन् ।
यसका लागि १ हजार ४ सय १३ जना कर्मचारी खटाइएको मुख्य निर्वाचन अधिकृतको कार्यालय परासीका सहायक निर्वाचन अधिकृत रुद्रप्रसाद रेग्मीले बताए ।
